Euskal Kostaldeko Gabonetako Azoka

                      Euskal Kostaldeko Gabonetako Azoka:

familia osoarentzako erosketak eta jarduerak Ficoban

• 140 erakusketari eta hiru pabiloi proposamenez beteta
• Mediterraneoan barrena egiteko itsas bidaia bat zozkatuko da,  eguberrietako sortak orduero eta Eguberrietako saski bat eta erosketa-txartel bat egunero
• Azokarekin batera, Irungo Artisautza Erakusketaren VII. edizioa egingo da, Gabiltzak antolatuta
• Azoka abenduaren 6tik 8ra egingo da Ficoban

. Euskal Kostaldeko Gabonetako Azokak hamaikagarren edizio du aurtengoa, eta erakustazokako hiru pabiloiak beteko dituen erakusketa-eskaintza zabal batekin itzuli da Ficobara. Urtez urte milaka bisitari hartzen ditu azokak, eta horrela, Gipuzkoako bisitatuena bihurtu da. Oraingoan, 140 erakusmahai inguruko eskaintza izango dute eskura bisitariek.

Eskaintza gastronomikoa izango da ugarienetako bat. Bisitariek kalitatezko gastronomi produktuak aurkituko dituzte; beste batzuk, egun horietako berezkoak direnak eta, berritasun gisa, Iparraldetik ere produktu asko egongo dira: Irulegiko ardoen sindikatua, Ossau jatorri-deitura defendatzeko sindikatua, Piment d`Espelette jatorri-deituraren sindikatua, Kintoa euskal txerriaren Elkartea (Iparraldeko nekazaritza ekologikoko gaiak) eta IDOKI Euskal Herriko abeletxeetako ekoizleen elkartea.

Aisia eta denbora librea dira azokako beste erakargarrietako batzuk. Aurten, turismoko eskaintza instituzionala Basquetour-ek (Turismoaren Euskal Agentzia. Eusko Jaurlaritza) eta Gipuzkoako Foru Aldundiko Turismo departamentuak ordezkatuko dute.  Gouretteko turismo bulegoa ere badator Gouretteko eski-estazioa ordezkatzera; eta Euskal Kostaldeko Gabonetako Azokaren edizio berri honetako eskaintza osatzeko, Osasuna eta Edergintza, Dekorazioa, Moda eta Osagarriak, Etxea, Ibilgailuak eta Zerbitzuak alorretako proposamenak.

Bertako merkataritzaren presentzia

Irungo merkataritzak, herriko udalak lagunduta, presentzia nabarmena izango du. Irungo hamabi establezimendu txandatuko dira stand batean, ‘Irungo Merkataritza, oparitu emozioak!’ goiburuarekin; eta bertan, bere eskaintza erakutsiko diote jendeari, eta horrekin batera, gainera, jarduerak ere antolatuko dituzte, goiz eta arratsalde, txikientzat eta helduentzat.

Jende ororentzako jarduerak

Euskal Kostaldeko Gabonetako Azokaren helburuetako bat da familia-plan bat eskaintzea bisitariei. Horretarako, jarduera ugari antolatzen dira adin guztietako jendearentzat, azoka irekita dagoen ordutegi osoan: puzgarriak, joko didaktikoak eta ludikoak, proiekzioak, zumba familian, sukaldeko master class, ospakizunetarako makilajea, eskulanetako tailerra frantsesez, talo bat nola egin, nola sortu zure poltsa pertsonalizatua eta jasangarria, haurrentzako minidiskoa, antzerkia, oka-jokoa Gipuzkoako Aldundiak antolatuta, erakusketak, magia-emanaldiak… (http://expo.ficoba.org/micro_expo/visitar).

Opari jasa

Euskal Kostaldeko Gabonetako Azoka bisitatzeak badu beste eragingarri bat ere; izan ere, zozketa ugaritan parte hartzeko aukera izaten da. Gogokoena, bi lagunentzako itsas bidaia bat Mediterraneoan barrena. Baina askoz ere aukera gehiago dago opari bat eskuratzeko. Ordu oro Eguberrietako loteak zozkatuko dira, eta egunero, Eguberrietako saski bat eta 125 euroko txartel bat, azokako standetan gastatzeko.

Elkartuz gunea

Gune honetan, Txingudiko elkarteak eta Gipuzkoako GK erakundeak biltzen dira, eta aurten, bertan izango dira Amnistia Internazionala, Alboan Fundazioa, Chernobilen Lagunak, Gipuzkoako DYA, Oxfam Intermo, Kaleko Elkartasun eta Kultur elkartea, EIPE-Asociación Emprendimiento Integral para el Envejecimiento - ZAEI Elkartea:  Zahartzearen aldeko Ekintza Integrala, eta Kale Dor Kayiko Elkartea.

Irungo Artisautzaren VII. Erakusketa

Gabiltza elkarteak aurten berriz ere Irungo Artisautzaren Azoka antolatu du, Euskal Kostaldeko Eguberrietako Azoka dela eta. Aurreko urteetan bezala, Artisautzako Erakusketak ahalegin handia egin du bere erakusketa-eskaintza jarduera-programa askotariko batekin osatzeko. Horrela, bada, bisitariari, batik bat txikienei, aukera ematen dio artisautzaren munduan sartzeko, era praktikoan eta dibertigarrian.

Datu praktikoak

Azoka abenduaren 6tik 8ra egingo da Ficoban. Astearte eta asteazkenean, 11:00etatik 21:00etara, eta ostegunean, azokaren azken egunean, 20:00etan itxiko dituzte ateak. Sarreraren prezioa 3€ eurokoa izango da, eta 12 urte bitarteko umeak dohainik sartu ahal izango dira. Ficobako parkinga eta egiten diren jarduerak dohainik dira.

Abenduaren 6an, asteartean egingo da, 12:00etan, Euskal Kostaldeko Gabonetako Azokaren inaugurazio ofiziala.

http://expo.ficoba.org